Night Bazaar de Kalang Mi

Hkawn Nu/ Chiang Mai

August 18, 2004 — Mani sumsai myiman n’sam hte shayi sha Ma Roi, marang htu ai hpe pyi hpa zawn n nawn ai sha gat dut shakut nga ai. Ma Roi gaw Thai mungdan Chiang Mai mare na Night Bazaar ngu ai maigan buhkawm masha ni a matu laksan hpaw da ya ai na shana gat langai kaw gat dut let kan bau bungli galaw nga ai rai nga ai.

“Masha mayam galaw ai kaw na hpaji law law lu sai ngu myit ai, myit dingman, tengman ai hte shakut yang awngdang ai lam lu la ai,” ngu Ma Roi gaw Night Bazaar kaw gat dut ai 8 ning laman hta lu la ai mahkrum madup ni hpe tsun wa ai.

N’dai gat dut shara hta shi zawn gat dut nga ai Myen mung masha n law htum 500 daram hta na anhte Jinghpaw Wunpawng myusha ni 200 daram lawm nga ai.

Gat dut ai lam hta tara shang bungli galaw lu lekmat lu ma tim, 2003 ning October kaw na n mai lang sai lam Thai Atsuya hku na jasat dat ai majaw bungli galaw ai hta yak hkak ai lam ni grau pru wa ai. N’kau mi bungli galaw nga ai kaw na pru ra mat n’na, n’kau mi lagyim ai hku galaw sha ra mat ai.

Night Bazaar hta dut nga ai arung arai ni malawng gaw lata hte galaw shapraw ai hpun sumli rai ni, hpun krawk-krau rai ni, Thai myusha ni a htunghking arung arai ni hte madum sumpyi ni rai ma ai. Dai sha n ga, ban sa chyai ai shara Karaoke seng ni, Beer Bar ni, Yungwi pinra ni hte maigan lusha seng ni hpe mung mu lu ai.

Ma Roi bungli ningnan shang yang, bungli madu a dip sha hkrum ai lam, shabrai kachyi sha jaw n’na shangun sha dik ai lam ni hpe hkrum sha wa ai hpe grai yawn ai myiman n’sam hte tsun dan ai. Night Bazaar hta gat dut bungli galaw ai ni gaw shabrai n law htum Baht 3,000 kaw na 10,000 lahta de lu ai lam chye lu ai.

Yaw Wah ngu ai Night Bazaar kaw gat dut nga ai ramma tsun ai gaw, Myen mung masha ni n’dai gat gaw bungli galaw byin ai gaw shana ten re majaw bungli tsang ai sha n’na shani ten hta mung kaga bungli ni mai galaw ai majaw re lam chye lu ai. Raitim, Myen mung masha ni hpe Thai amu madu ni gaw kam ai hku shangun sha ai hte lu ging ai ahkaw ahkang ni hpringtup n jaw ai sha n ga, shabrai hpe mung Thai myusha ni hpe jaw ai hte maren n jaw ai rai nga ai.

Maigan buhkawm masha ni mung dai shara de sa let, grai myitlawm ai hte yu hkawm, gawan chyai hkawm nga ma ai. Raitim, dai ning laman gat lu dut ai madang hta yawm wa ai lam chye lu ai. Dai lam hte seng na Seng Naw ngu ai ramma tsun ai hta, Thai Atsuya a ‘One township, One product’ ngu ai gunrai gat lawk hpe Bangkok kaw hpaw dat ai majaw Chiang Mai Night Bazaar hta gat lu dut ai madang yawm mat wa ai lam chye lu ai.

Htunghking hpun palawng ni hpe sumraw mawn sumli let, shanhte a htunghking rai matik matawk ni hpe hpye dut hkawm nga ai Thai mung nga bum masha ni hpe mung lam hkan e mu lu ai. Shanhte a gat rai ni hpe lu dut hkra lai wa ai maigan masha ni hpe hkan shaga, ta dingsi let gat dut shakut nga ma ai.

Night Bazaar hta gat dut nga ai Myen mung masha ni hte gat mari nga ai maigan bu hkawm masha ni gaw grai asak rawng ai hku na shamu shamawt nga ma ai hte maren anhte myusha n’kau mi a shat tam sha ai shara langai mung rai nga ai.