Ndai Munghpawm Myen mung dan a lam hpe kadun ai hku hkren di nna ndai zawn gran dan dat ai gaw, ya na ramma ni a matu akyu nga dik ai labau lasang hpe bai nhtang mu lu na lam hta hkrak dik ai lam rai sai. Myen hte Myen nre ai ni a lapran gasat hkat ra wa ai, myit machyi sin dai nsu,hpyen chyip chyip byin wa ra ai a ningpawt hpe asan sha chye lu ai hpang gaw, gara de man yawng nna myit sa wa ra ai hpe grau hkawn shangun nga sai.

Grau nna gaw Jinghpaw hte Myen ni moi chyaloi nhkoi kaw nna labau hta hpyen hku shada ganawn ai lam nmu lu tim,  Rawt Malan hpang kaw nna gaw, hpa rai wa ndai daram myit machyi hkat nju hkat, sindawng hkat ai hte gasat na, nat na sat na, nkam yu ai, nkam madat ai, nkam mada ai, nju ndawng lam lani hte lani kaba hkrai kaba tsaw hkrai tsaw wa ai hpe pu sin lata nna masit jahkrat nhtawm myu sha lam hpe bai jahkrung la ra sai le. Kachinnews ni mung, mungdan kata kaw hpa byin wa sai law, ndai hku up sha sai law, htaw ra hku shakrip bun sai law nga ai shiga hte chyu sha masha a myit hpe nkawp shangun, na ai ni yawng salum machyi kaning sha gaw nchye di, dang lu ai lam langai mung nnga, ngwi pyaw simsa ai hte pyaw ngawn ai prat pra lam hpe mung masa hte sha mai galai jashai kau lu a ni?

Mung masa myi jut hku sha amyu sha lam galu kaba mai  sani? kaga lam hku gaw amyu sha zet kung wa na lam, hpaji chye wa na lam, galaw lu galaw sha chye wa na lam hkrak sha nnga sani? N nga sai lama nga yang nkau mi hpa rai hpji chye nna lu su ma ta? ndai nye a ga baw hte she bawngban mayu sai. Rawt malan gasat ra ai gaw Myen wa sha nrai, ana ahkya, akyang lailen, masu sha mawp sha, lagu lagut hte kam nmai ai sak hkrung lam ni hte kaga mung masa hte n kasawt ai tsin yam tsin dam lam rai nga ai. Sumsing mungdan lam mung dai hte she matut nga ai.

Dai majaw, ndai zawn shiga dap hku nna lit la nhtawm, shiga shabra nga ai ni a ndan pala, pyawng mahka, lahpaw si, nri matu, nhtu shan ni gaw Myu sha hpe 'Positive thinking' kaga ngwi pyaw simsa ai sak hkrung lam hpe gaw gap la na ginjang hpe mung mai shapoi shabra nga ai nrai ni?

Nye a kraw salum hta twi machyi nga ai gaw Mung Masa nrai, kraw dung myit masa hte kyang lai htung galai kau ra ai Wunpawng sha ni a prat maka rai nga li ai.

Lahta na Editor hpang de shagun laika gaw bumsinwaster@gmail.com kaw na “Munghpawm Myen Mung ngu ai” Kachin Post a editor n’sen hpe lakap n’na shagun ai laika rai n’na, shi ningmu ni sha re ai hpe chye shangun mayu ga ai.