Kani Dawm na KIO Sadi Jaw
The Kachin Post
April 21, 2002—Jinghpaw mungdaw hta Kani shapraw ai lam hpe dawm kau na matu KIO ga sadi jaw ai lam hpe April shata 20 ya shani na AP shiga hku chye lu ga ai.
"Anhte gaw Asuya ni hte sha n'ga Nang hpang lu sha ni dawm kau na hte seng na galaw nga ai hpung ni hte mung bungli rau jawm galaw na rai n'na mung chying sha ni hpe mung ndai zawn rai yaw shada ai lam ni hpe madi shadaw garum wa na matu saw shaga sa wa na re" ngu na February shata praw hta shabra ai KIO tang madun laika hta ka shalawm da nga ai.
KIO tsun ai hta "anhte gaw Jinghpaw mungdaw na Nanghpan lu sha hkai shapraw ai hte dutlu dutsha ai lam ni hpe pat shingdang sa wa na rai n'na Kani malai hkai ai hkai n'mai ni hkai ai lam hte Kani ya ni hpe bai shalan shalat ai lam ni hpe madi shadaw sa wa na re" ngu na tsun wa ai.
Ndai kalang gaw KIO aq shawng n'nan lang na Kani hte Nanghpan lu sha hpe pat shingdang ai lam hpe dan dan leng leng masat na galaw ai rai nga ai. Ndai zawn rai ai aten hta Samung na Mahtu Naw aq KDA hpung mung shanhte ginra gaw 2005 ning hta Kani hte Nanghpan lu sha n-nga ai shara tai wa na matu galaw na ngu na ga sadi jaw ma ai.
April shata praw hta shapraw ai KDA laika hta Kani hte Nanghpan lu sha hpaga ga ai, htaw shalai ai, makoi zing da ai hte lu sha ai lam ni yawng hpe ya ten kaw na pat kau sai ngu na ka da nga ai.
Ndai zawn rai bungli masing ni gaw Asuya aq shdut ai lam hte mungkan ting Myen mung hpe Kani hte seng na mara shagun nga ai lam ni hpe ginhtang na matu galaw ai rai n'na Kani hte seng na ta tut galaw nga ai ni hpe grai nyam ai ladat ni hte shakrip sa wa na matu re ngu na dai laika hta tsun da nga ai.
Mungkan shingwang yawng gaw Myen mung hpe shi hte gap hkat jahkring da ai rawtmalan ginra hkan Kani hte Nanghpan lu sha ni aging agang htuk shapraw nga ai hte seng n'na jahpoi asawng nga ai rai nga ai.
Myen hpyen Asuya gaw 1997 ning kaw na Kani hte Nanghpan lusha ni hpe du na ra ai 15 ning laman hta gasat shamyit kau na matu masat na galaw wa ai raitim kaja wa hkrak rai galaw ai lam n-nga ai majaw Mungkan ting kaw na jahpoi asawng hkrum nga ai mungdan rai nga ai.
