Manau shadung shachyaw na matu Thai ahkang jaw

The Kachin Post

August 9, 2002—Jinghpaw Wunpawng htunghking Manau shadung hte htunghking n'ta hpe Thai-Myen ga jarit makau na Ban Mai Jinghpaw mare hta gawgap na matu Thai ni hku na ahkang jaw sai lam mare Slg Dau Hkawng Kachin Post de tsun dan wa ai.

Thai uphkang ai ni hku na ndai ahkang hpe ndai shata praw hta jahkrat ya ai rai n'na Manau shadung hte Jinghpaw n'ta gap na matu Thai Baht 50,000 hpe Ban Mai mare na Jinghpaw Wunpawng htunghking sharawt hpung lit hkam ni hpe ap ya n'na shata mi laman hta shangut ya na matu masat ya sai rai nga ai.

“Manau shadung nga wa ai majaw Wunpawng myusha yanwng mung kabu gara na hpe kam ai” ngu mare na htung hking hpung ningbaw Slg Dau Hkawng tsun wa ai.

JW myusha ni a buga n re ai maigan mungdan kaw manau shadung lu shachyaw la lu na lam hpe Thai ni hku na JW htunghking hpe sharawt ya na hte hpawn maigan bu hkawm ni sa du chyai ai ginra langai byin pru wa na matu yaw shada le galaw hpang wa ai rai nga ai. Ndai magam hpe Thai Hkawhkam a masing magam dap (Royal Project Foundation) ni kaw na ahkang jaw ai rai nga ai.

“Mare masha ni mung myit lawm ai hte maren Manau shadung lu galaw da yang grau na myit hkrum lam lu wa na shadu ai,” ngu Royal Project Foundation hte seng na Ban Mai mare lit hkam Thai Slg langai tsun wa ai.

Thai uphkang ai ni hku na Jinghpaw Wunpawng myusha ni hpe laiwa sai ten hta ndai zawn rai masta dingsat jaw ai lam n nga shi ai raitim ya ten kaw na gaw Thai mung nga myusha langai hku masat ya wa sai rai nga ai. Ngut na JW myusha ni a htunghking sharawt let makawp maga na matu hte dai lam hpe maigan bu hkawm ginra langai byin tai lu wa na matu yaw shada ai lam a majaw mung masat dingsat jaw wa ai re ngu na mare Slg langai tsun wa ai.

“Manau shadung nga ai majaw maigam masha ni sa chyai n'na htung hking arung arai ni lu dut wa na re majaw mare masha ni shang gumhpraw nga wa na re” ngu mare lit hkam Slg langai tsun wa ai. “Wunpawng myusha ni hpe maigan myusha ni grau na dam lada ai hku chye na masat dingsat jaw wa na re” ngu matut tsun wa ai.

Manau shadung gap na hta jailang na matu Thai ni hku na jaw ai gumhpraw gaw nlaw ai majaw Thai nga jinghpaw ni hpe garum hpyi na re ai lam hpe mung mare na htunghking hpung ningbaw wa tsun wa ai. Ngut na Jinghpaw Wunpawng htunghking sharawt hpung (Ban Mai) hku na garum gumhpraw ni hpe ya ten kaw na hkap la sai lam chye lu ga ai.

Chiang Mai mare na Kilo 100 jan tsan ai Ban Mai Jinghpaw mare gaw lai wa sai 1970 grupyin hkan na Shanglawt hpyenla dingsa ni gaw de hpang wa ai rai nga ai. Ya ten hta gaw n'ta htinggaw 60 daram nga ai rai nga ai.