Myen hpyen du Mali hka dut sha

The Kachin Post

August 25, 2002—Jinghpaw mungdaw Myen hpyen du ni a Nothern star company hku na Miwa lauban Ying Hai hpe Myitkyina makau na mali hka mayan hta ja htu na matu sen 8000 hte dut kau sai lam Myitkyina na kam mai ai shiga hku lu la ga ai.

Ja htu na dabang gaw Myitkyina mahkrai lawu deng mi kaw na Hkat Chyo mare du hkra hka deng 7 galau ai rai nga ai. Dai mayan hta Ja htu jak kaba 21 tawn n'na htu na rai nga ai. Ja htu na ladaw gaw 2002 ning July shata kaw na 2003 ning May shata du hkra htu na rai nga ai.

“Anhte a sitlali ai buga hta Ja htu ai majaw Kun (mercury) dat hkrai hpring mat sai” ngu Myitkyina na Slg langai tsun dan wa ai. “Mali hka na hka lang na matu ya ten hta grai tsang ra sai re” ngu matut tsun wa ai.

Dai hku Ja htu ai lam hpe Myitkyina mare masha ni hku na n ra sharawng ai majaw Myitkyin mare Shatapru lawk na Slg marai 50 hte Mali hka kau Hpungki jaw langai rai nga ai Wun Tho jawng na Hpungki kaba ni gaw Myen hpyen du Mawng Mawng Swe hpang de ninghkap laika shagun da ai rai nga ai. Dai laika hpe Myen hpyen du ni hku na ya ten du hkra hpa lit la na htai ya ai lam n nga ai hpe mung chye lu ga ai.

Nothern Star company gaw Jinghpaw mung dap awn daju Mawng Mawng Swe Jinghpaw mung de htawt wa hpang hpaw hpang wa ai rai n'na Myen hpyen du ni a hpaga dap kaba rai nga ai.

Maung Maung Swe gaw Ja htu ai kaw na lu ai gumhpraw wan 500 hpe shi kasha jawng lung na matu Asia Wealth Bank kaw bang da ai lam hpe Bank hte ni nawn ai Myitkyina mare masha langai tsun dan wa ai. Myen hpyen du ni law malawng gaw Inwa Bank kaw sha gumhpraw mahkawng ma ai raitim Mawng Mawng Swe gaw Asia Wealth Bank kaw mahkawng wa ai majaw Myitkyina na sawk sagawn ai ni a lapran hta myit yak nga ai lam chye lu ga ai.