NLD Salang N'kau hpe NC Lung na Saw Shaga

The Kachin Post

April 8, 2004 — National League for Democracy NLD pati, Myen Hpyen Atsuya ninghkap hpung, a ginjaw salang marai 5 gaw Mung Hpawm Amyusha Mungbawmg Zuphpawng, National Convention, de sa du lung na matu Myen Hpyen du ni hku n’na saw shaga hkrum ai lam The Irrawaddy shiga hku chye lu ai.

Myen Hpyen Atsuya gaw NLD ginjaw salang ni hpe NC lung na saw shaga laika hpe mani shagun ya ai re lam NLD ginjaw salang langai rai nga ai Nyunt Wei tsun wa ai. Raitim, ngam nga ai NLD ginjaw salang marai 4 hpe saw shaga ai, n shaga ai lam hte seng n’na shi n chye shi ai lam matu tsun wa ai.

NLD Ninggawn Amu Madu Aung San Suu Kyi, Tingnyang Up Aung Shwe, Ningtau Tingnyang Up Tin Oo hte Amu Madu U Lwin ni gaw maning na May shata 30 ya shani Mongywa ginwang Depayin mare hta byin ai manghkang kawn dai ni du hkra rim rawng da hkrum ai rai nga ai. Dai mang hkang hta NLD malawm n law htum marai 4 si n’na 100 daram hkala hkrum ai rai nga ai.

NC lung na matu saw shaga hkrum ai NLD salang ni gaw Myen Hpyen du ni a saw shaga wa ai lam hpe shanhte a ningbaw Aung San Suu Kyi hpe rim da ai kaw na kalang ta dat ya na matu hpyi shawn dat ai lam chye lu ai.

Bai galaw na NC hpe May shata 17 ya shani hta hpang wa na re ai lam hpe lai wa sai March 30 ya shani hta Myen Hpyen Atsuya ni hku n’na n’dau wa sai rai nga ai. Shawng lang na NC gaw 1993 ning January 9 ya hta hpang wa n’na, Aung San Suu Kyi woi awn ai National League for Democracy Parti NLD n shang lawm mat ai hpang 1996 ning March 31 ya hta jahkring da ai rai nga ai. NLD dat kasa ni gaw 1995 ning November shata kawn n shang lawm sai rai nga ai.

Mani na NC lung na saw shaga ai lam hta kaga mung masa pati ni hte myusha hpung ni hpe mung saw shaga ai lam chye lu ai.

Du na ra ai NC hpe Yangon mare kawn mile 23 daram tsan ai Hmawbi mare na Nyaungnapin ngu ai shara hta galaw na re lam mung chye lu ai.