JLH Mandalay Htunghking Madun Poi Galaw na Shajin
The Kachin Post
August 13, 2004 — Jinghpaw Laili Laika hte Htunghking Hpung, JLH, Mandalay hku n’na Jinghapw Wunpawng htunghking madun ai lam hte htunghking bu-hpun tsawm shayi shingjawng poi hpe hpawt ni Mandalay mare hta galaw na lam, JLH lit hkam ni tsun wa ai.
N’dai poi hpe Mandalay mare Gawknu (city hall) kaw August 14 ya shana de hking 4 hta galaw hpang na rai n’na, Mandalay mare kata na Dakkasu yawng, Monywa Sut Dakkasu hte Meiktila Dakkasu na jawngma ni shang lawm na rai nga ai.
Poi galaw ai a yaw shada ai lam gaw, anhte Jinghpaw Wunpawng myusha ni tinang a htunghking bu-hpun mawn sumli ai lam hpe ya na prat dep ramma ni manu shadan chye na maut, grau hkrak ai hku gyin shalat bu-hpun chye na matu hte Mandalay Dakkasu ni hkan hpaji sharin la nga ai Jinghpaw Wunpawng jawngma ni shada hku hkau kanawn mazum let gahkyin gumdin lam lu na matu rai nga ai.
Htunghking madun poi lekmat ni hpe Kyat 1,500 hte 3,000 masat let dut shabra nga ai rai n’na, poi hta shagrau kumhpa lu ai ni hpe gaw No 1 hpe Kyat 100,000, No 2 hpe Kyat 80,000 hte No 3 hpe Kyat 50,000 hpra shagrau na lam san da ma ai. Shagrau kumhpa matu gaw Wunrawt Company hpe garum hpyi da ai lam chye lu ai. Poi hta shang lawm shingjawn ai ni a matu mawn sumli ai lam hpe gaw Mandalay mare na anhte myu sha ni hpaw da ai mawn sumli gawk (beauty palar) ni kaw na garum jaw na rai nga ai.
Ya ten hta Dakkasu jawngma ni gaw poi lekmat ni hpe hkan dut shabra nga n’na, shang lawm shingjawng na ni mung bu-hpun palawng hkrang ni shapraw let hkyen lajang nga ma ai. Poi galaw na hpe Dakkasu jawngma yawng myit lawm nga ai hte, shanglawm shingjawng na ni mung tak da ai hta grau law wa ai lam, JLH lit hkam tsun dan wa ai.
Anhte myusha yungwi ninghkring ni rai nga ai Ah Tang, Nang Dwe hte Lahtaw Zau Lum ni hku na n’dai poi hta shangwi shapyaw ya na lam chye lu ai.
Jinghpaw Wunpawng jawngma marai 400 jan gaw dai ning na laman hta Mandalay Dakkasu hta laika hpaji sharin la nga ai rai nga ai. Dai ning na Mandalay Dakkau JLH Amu Madu gaw Marip Seng Hkum rai nga ai.
