National Convention hte Seng n’na Myitkyina kaw Sanglang Dan

Malihkrang Uma/ Myitkyina

July 26, 2004 — Wunpawng Mungdan Shanglawt Hpung, KIO, a Tingnyang-Up Malai II Dr. Tu Ja gaw National Convention, hte seng ai lam ni n’tsa KIO a ningmu ni hpe Myitkyina mare masha ni hpe July 24 ya hta sang lang dan ai rai nga ai.

Dai lamang hpe Myitkyina mare Shatapru lawk na Wunpawng Mungbawng Rapdaw, WMR, rung kaw galaw ai rai n’na, Hkristan Hpung shagu na Hpung salang ni, Sut Du ni, mare salang ni hte mung shawa ni sa du shang lawm ma ai.

“Anhte gaw Internal Politic hku shang ra ai, External Politic hku gaw n mai byin ai,” ngu Dr. Tu Ja tsun wa ai. “Positive approach hte shang na kun? Negative approach hte shang na kun? ngu ai lam hta negative a mahtai gaw negative sha re, positive hte shang yang she anhte ra ai positive mahtai hpe lu la na rai nga ai.”

Myen Hpyen Atsuya National Convention galaw ai gaw mung masa jahkrup na matu chyinghka loi mi hpaw ya ai lachyum rai n’na, n’dai hta grau maden ai chyinghka hpaw ya hkra anhte hku n’na shang kanawng ra ai lam, Dr. Tu Ja tsun wa ai. “Anhte nan n ganawng hpaw la yang gaw dai limit hta jan n’na hpaw ya na lam n nga sai.”

Dr. Tu Ja woi awn ai KIO dat kasa ni gaw July 9 ya hta National Convention jahkring hkring sa ai majaw Yangon mare de na bai du wa ai rai nga ai.

Dr. Tu Ja tsun dan ai hta, n’dai lang na NC hta mayak manghkang kaba dik gaw Daru magam garan kachyan ai lam (Power sharing), hte Hpyen Atsuya gaw States, Divisions ni hte seng n’na uphkang ladat ni hta grai sadi ai hte kachyi mi mung n hkra gwi ai lam chye lu ai. N’dai lang na National Convention gaw Myen mung a Power Sharing hta Hpyen dap hpe 25% jaw ra ai lam, Guided Democracy hte Munghpawm mungdan a’jet byin lu na matu multi-party hpe madung dat ai lam, Dr. Tu Ja mu mada ai rai nga ai.

National Convention bai hpang ai shaloi gaw Uphkang lam hte Tara dawdan ai lam hte seng n’na jahkrup na lam nga ai majaw mung masa myit lawm ai ni hte Myu hpe tsaw ra ai myitsu kanu kawa ni kadai mung hpaji jaw tang madun na matu lam hpaw da ai lam, Dr. Tu Ja tsun wa ai.

Dr. Tu Ja hku n’na sanglang dan ngut ai hpang, du sa ai myitsu salang ni gaw tinang a ningmu ni hpe tsun htai lai ai hte ga san ni hpe mung wanglu wanglang san-htai galaw ai lam chye lu ai.