Jinghapw Mung na Myen Hpyen Dap Shagreng Nga
The Kachin Post
June 23, 2004 — Jinghpaw mung na Myen hpyen dap n’kau mi gaw Yangon mare hta National Convention galaw nga ai laman hpyen n’gun dat shagreng nga ai lam, Wunpawng Mungdan Shanglawt Hpyen Dap, KIA, shiga hku chye lu ai.
May 28 ya hta Sinbo mare na Hka-La-Ya (Light Infantry Battalion) 141 hta Hpyen n’gun 60, 3.5 inches Launcher 1 hte MA-1 sinat ni wa jahpring bang ma ai lam mying n tsun ai KIA hpyen du langai tsun dan wa ai. June shata praw hta Lidu (Ledo) lam mayan na Shing Bwi Yang mare hta Myen hpyen dap ningnan Hka-La-Ya 827 hpe hpaw jat ai hte Lidu lam mayan na Myen hpyen dap a Uloi Bai post hta mung hpyen la marai 10 laknak hte hpawn jat da ai lam chye lu ai.
“NC [National Convention] zuphpawng n byin wa jang Rawtmalan ni hpe gasat na matu re,” ngu Myen hpyen la ni tsun nga ma ai lam hpe KIA hpyen du bai tsun dan wa ai. Dai sha n ga Myen hpyen dap ni gaw KIA a shamu shamawt ai lam ni hpe mung sin yu sawk sagawn nga ai lam chye lu ai. Lidu lam mayan Dum Bang e dap jung ai Hka-La-Ya 298 ni Dum Bang mare slg. Gam Reng hpe KIA magam gun a ni lai wa lai sa shiga hpe n jaw ai majaw, hpa majaw shiga n jaw ai lam hpe dap 298 de lawan sa sang lang dan ra na lam, laika shapraw da ma ai. Lidu lam mayan na Myen hpyen dap ni gaw Hka-La-Ya 297 (Jahtu Zup), Hka-La-Ya 298 (Dum Bang), Hka-La-Ya 126 (Nam Yung), Hka-La-Ya 86, 238, 318 (Danai), Hka-Ma-Ya 827 (Shing Bwi Yang) ni rai nga ai. Jinghpaw mung ting hpe Myen hpyen dap a Northern Command gaw dap dung (battalion) 46 jung n’na shamu shamawt nga ai rai nga ai. Dai hta n ga, Danai mare kaw Danai Regional Operation Command, ROC, Mogawng mare kaw No. 3 Military Operation Command, MOC, Man Maw kaw No. 21 Military Operation Command, Putao hte Momik kaw Military Operation Command langai hpra hte Operation Command No. 1, 2, 3 ni dung nga sai rai nga ai. Ngut na Myitkyina mare na Military Intelligence, MI, 1 hte 8, hte Man Maw mare hta MI 21 ni rung hpaw let shamu shamawt nga ai rai nga ai. Myitkyian mare makau hta mung Myitkyina Military Air Base nga ai rai nga ai.
