Gap Hkat Jahkring Hpung ni Myen Hkringmang Daju hte Hkrum

The Kachin Post

May 14, 2004 — Myen mung Hkringmang Daju General Khin Nyunt hte Myen hpyen dap hte gap hkat jahkring lam la da ai Myusha hpung 15 daram a dat kasa ni gaw May 13 ya jahpawt hta hkrum shaga ma ai lam chye lu ai.

Dai hkrum shaga ai lam hpe Yangon mare na Zeyarthiri htingnu hta hkrum shaga ma ai rai n’na May 17 ya hta galaw hpang wa na National Convention hte seng n’na tsun jahta ma ai lam, mani na zuphpawng de sa du lawm ai Wupawng Mungdan Shanglawt Hpung KIO a Ningtau Ninggawn Amu Madu Du Kaba Sumlut Gun Maw tsun wa ai.

“Ya na National Convention hta myit galu ai hte awng dang hkra jawm galaw ga,” ngu Khin Nyunt tsun ai hpe Du Kaba Gun Maw bai tsun dan wa ai.

Khin Nyunt hku n’na Myen mung a mung masa lam hta Hpyen dap shang lawm na lam gaw mungdan a matu kaja na matu she re ai lam tsun wa ai. “Hpyen dap hpe shara kachyi sha mi pi n kam jaw ai nga na ai majaw anhte mung myit grai n pyaw ai,” ngu Khin Nyunt tsun wa ai.

Myusha gap hkat jahkring hpung 15 gaw May 10 ya hta Myen hpyen du National Convention a lit hkam langai rai nga ai Brig-Gen Than Tun hte hkrum n’na National Convention a matu hkrum bawng bang ma sai rai nga ai. Dai shani bawng ban ai lam hta gap hkat jahkring hpung n’kau mi hpyi shawn wa ai, Myen mung a mungmasa lam hta hpyen dap shanglawm na lam hpe, National Convention hta bai jahkrup la mai na masa ni nga ai lam Than Tun tsun wa ai.

National Convention de sa du lung na mungdan ting na dat kasa ni gaw mani May 13 ya kawn mying jahpang bang nga sai raitim Hpyen atsuya hpe ninghkap nga ai National League for Democracy pati NLD hte Myusha pati ni gaw ya ten du hkra lung na matu n daw dan shi ai rai nga ai.

Dai ni May 14 ya gaw National Convention sa du lung na ni mying bang na matu hpang jahtum n’htoi rai nga tim Myen mung democracy ningbaw Aung San Suu Kyi hpe ya du hkra shi n’ta kaw rim da ai kawn n dat ya shi ai rai nga ai.

Myusha gap hkat jahkring hpung ni yawng gaw dai ni hta National Convention galaw ai Nyaunghnapin Kwin de sa du na re lam chye lu ai.