Lasang Awng Wa Pang Wa Du

The Kachin Post

May 25, 2004 — Wunpawng Mungdan Shanglawt Hpung KIO a Myusha Shimlam Dap ningbaw Usa Du Kaba Lasang Awng Wa gaw Pang Wa mare kaw du shingbyi nga ai lam chye lu ai.

Du Kaba Lasang Awng Wa gaw lai wa sai bat 2 daram kaw na New Democratic Army-Kachin NDA-K ginjaw Pang Wa mare kaw shi a ma ni hte du nga sai lam, NDA-K hpyen du langai tsun wa ai. “Lasang Awng Wa gaw NDA-K hpung de shang ai n re, mung masha langai hku sa nga ai she re,” ngu NDA-K hpyen du tsun wa ai.

Lasang Awng Wa gaw January shata praw hta KIO ginjaw kaw byin wa ai manghkang a majaw Miwa Gumsan mung de koi yen hkawm nga ai wa rai n’na, KIO hku na mung dai manghkang hpe woi galaw ai ningbaw langai hku masat da ai rai nga ai. Dai ten hta shi hte shi Myusha Shimlam Dap na hpyen ma marai 30 kawn 200 daram koi yen mat ai rai nga ai.

Dai koi yen mat ai hpyen ma ni hpe KIO hku n’na February 24 ya n’htoi hte shapraw ai Aming laika hta Lasang Awng Wa hte dai manghkang hpe woi awn ai ningbaw masum hta lai n’na yawng hpe mara raw ya sai rai n’na KIA hpyen dap de bai wa na matu tsun da nga ai.

Pang Wa mare hta Du Kaba Lasang Awng Wa shingbyi nga ai hte seng n’na, KIO Ninggawn Amu Madu Du Kaba Gunhtang Gam Shawng gaw January shata na manghkang hta shang lawm ai ni yawng hpe mara raw ya sai lam tusn wa ai. “Myit hkrum lam hpe jahten n’na shada hkawk hkat ai baw gayin shalat shapraw dat ai baw ngu hku n’na amyu myu mai sawn la ai,” ngu Du Kaba Gam Shawng tsun wa ai.

Laiwa sai ten ni hta KIO hpyen hprawng law malawng gaw NDA-K de shang shing byi magam gun nga ai rai nga ai. Dai zawn re ai ni hpe gaw KIO hku n’na hpyen hprawng ngu n’na masat da ai rai nga ai.

Raitim January shata na manghkang hta shanglawm ningbaw ai ni hpe gaw May shata 13 ya kaw n’na mara dat ya sai rai nga ai. “N’dai mara amu hte seng ai masha yawng hpe dai ni kaw n’na TSEP KAWP AWM DAWM MARA RAW DAT kau ya sai rai,” ngu May 13 ya hta shapraw ai Wunpawng Mungdan Shanglawt Kongsi Aming hta ka da nga ai.