Asia’s Heroes hta Aung San Suu Kyi No 1 Kagat Nga

Naw Awng/Chiang Mai

October 4, 2004 — Myen mung democracy ningbaw Nobel Simsa Lam ninghkring Aung San Suu Kyi gaw Time-asia magazine a Asia’s Heroes ngu ai internet laika man hta ra lata me jaw ai lamang hta dai ni na n'htoi du hkra No 1 me law dik htum hta kagat nga ai hpe mu lu ai.

Laika hti shawa a ra lata lam galaw ai hta Asia dan na shang lawm ai ningbaw ningla ni hte mying gumhkawng ai masha marai 20 hta na Aung San Suu Kyi gaw tsa lam shadang na 41.4 % me lu taw nga ai rai n’na, Malaysia mung na Anwar Ibrahim gaw 34.4 % hte Tibet mung na Dalai Lama gaw 20.9 % lu nga nga ai.

N’dai lam hte seng n’na maigan mungdan hkan na mung masa lam hta shamu shamawt nga ai Myen mung masha shada da phone, e-mail ni hte shana hkat re nga ai lam hpe mung chye lu ai. Bai n’na, n’dai ra lata ai lam hpe http://www.time.com/time/asia/2004/heroes/ ngu ai internet hkringdat hta dai ni hpang jahtum hku n’na me jaw mai ai rai nga ai.

Dai ning na Asia’s Heroes hta shang lawm ai ninghkring ni kaw na Aung San Suu Kyi chyu sha Yangon mare na shi a n’ta hta rim rawng da hkrum ai rai n’na, shi a mung masa galaw na ahkaw ahkang ni hpe mung Myen Hpyen Du ni hku n’na maning May shata kawn pat shingdang da ai rai nga ai.

N’dai lam hte seng n’na, Europian Union, EU, mungdan ni gaw du na ra ai October 8 ya hpang jahtum tawn let Aung San Suu Kyi hpe n’dat ya ai rai yang, Myen mung hpe sut masa hku n’na a ja a wa pat shingdan ai lam galaw na nga n’na tsun lai wa sai. Dai hta n’ga Mungkan Wunpawng Munghpawm a Ninggawn Amu Madu Kofi Anan mung Aung San Suu Kyi hpe alawan dat ya na matu grai lang hpyi shawn lai wa sai.

Laiwa sai 2003 ning na Asia’s Heroes ra lata lamang hta gaw, Thai hte Myen mung ga jarit hta Tsi gawk hpaw let Myen mung de na lam amyu myu a majaw Thai mung de du wa ai Myen mung masha ni hte refugee ni hpe tsi tsi lajang ya nga ai Tsi Saranum Kaba Dr. Cynthia Maung hpe mung bang shalawm da sai rai nga ai.