WMR, KIO, NDA-K ni Lasang Awng Wa hte Seng n’na Jahkrup Nga

The Kachin Post

September 4, 2004 — Wunpawng Mungdan Shanglawt Hpung, KIO, kawn garan pru mat n’na Pang Wa mare kaw shamu shamawt nga ai Du Kaba Lasang Awng Wa hte shi a malawm ni hte seng n’na bawng ban jahkrup ai zuphpawng hpe dai ni Maija Yang mare kaw galaw hpang sai lam, zuphpawng malawm ni tsun wa ai.

N’dai zuphpawng hta KIO, New Democratic Army-Kachin, NDA-K, hte Wunpawng Mungbawng Rapdaw, WMR, na ningbaw ni shang lawm bawng ban ai rai n’na Maija Yang mare na Maija Yang Hotel kaw galaw ai rai nga ai.

KIO ningbaw Du Kaba Lamung Tu Jai, hte Ginjaw malawm ni rai nga ai Du Kaba Zawng Hkra, Du Kaba Gauri Zau Seng, Du Kaba Dr. Tu Ja, Du Kaba Gunhtang Gam Shawng, Du Kaba Sumlut Gun Maw, NDA-K ningbaw Zahkung Ting Ying hte WMR dat kasa marai 9 shang lawm ai rai nga ai.

Madung dat na bawng ban ai lam ni gaw Du Kaba Lasang Awng Wa hte shi malawm ni hpe KIO kawn gara hku masat dingsat bai jaw na lam ni rai n’na, Kachin National Organization, KNO, ningbaw Sut Du Bawmwang La Raw hte seng n’na mung jahkrup na lam chye lu ai.

KIO, NDA-K hte WMR ni yawng gaw manghkang n nga sha hkrum wa na hpe ra sharawng nga ai lam zuphpawng hta shang lawm ai WMR dat kasa langai tsun wa ai. “Hkrum wa na matu shakut nga ai,” ngu WMR dat kasa tsun ai.

N’dai zuphpawng hta Du Kaba Lasang Awng Wa hpe shang lawm na matu saw shaga da ai raitim, n sa du lu ai lam chye lu ai. KNO ningbaw mung n’dai zuphpawng hpe shang lawm na matu Miwa Gumsan mung kaw du nga ai raitim, masa hpe yu n’na she shang lawm na lam chye lu ai.

KIO hku na gaw zuphpawng hta bawng ban na lam hte seng n’na laksak masing jahkrat da ai lam n nga ai lam hte, WMR kaw na woi bawng ban ai ningtsa hta hkan n’na jahkrup sa wa na lam, KIO ningtau Ninggawn Amu Madu Du Kaba Sumlut Gun Maw tsun wa ai. “Jahkrup ra ai madang grai law ai.”