KIO Ginjaw de Bai Wa na Lam Lasang Awng Wa Hkap La

The Kachin Post

September 25, 2004 — Pang Wa mare hta shamu shamawt nga ai Du Kaba Lasang Awng hpung gaw Wunpawng Mungdan Shanglawt Hpung, KIO, Ginjaw de bai wa na matu hkap la sai lam, Wunpawng Amyusha Mungbawng Rapdaw, WMR, Htinglu Htinglai Hpung a matsing laika hku chye lu ai.

September 20 kawn 23 ya du hkra Pang Wa mare kaw galaw ai Du Kaba Lasang Awng Wa hte WMR Htinglu Htinglai Hpung ni a zuphpawng ngut ai hpang n’dai zawn rai myit hkrum lam lu la ai rai nga ai.

WMR gaw Du Kaba Lasang Awng Wa hte KIO Ginjaw gaw langai sha byin tai wan a matu si mani ai zai ladat hku galaw sa wa na hpe myit hkrum sai hte maren Du Kaba Lasang Awng Wa hku n’na mung WMR a myusha myit hkrum lam gaw de sa wa ai hpe tesp kawp myit hkrum sai lam chye lu ai.

N’dai bawngban hpawng hta Lasang Awng Wa hpung hku n’na Hpyen ma lahkawn ai lam tsep kawp n galaw na lam hpe mung myit hkrum sai rai nga ai. Dai hte maren, N’mai Hku ginra hta magam gun nga ai ni yawng hpe KIO Ginjaw de bai ap ya na lam hte 2004 ning January manghkang a majaw KIO Ginjaw kawn zing la da ai arung arai hte Ja Gumhpraw ni hpe htap htuk ai hku bai lajang ya na matu Du Kaba Lasang Awng Wa tang madun da ai lam chye lu ai.

Myit hkrum, tang madun da ai lam ni hpe WMR Htinglu Htinglai Hpung malawm ni hte rau Du Kaba Lasang Awng Wa hte Du Padip Gam Awng ni ta masat mahkret sai lam chye lu ai.

Raitim, KIO Ginjaw hku n’na gaw Du Kaba Lasang Awng Wa hpung ni hpe chyinghka hpaw da ya ai hte maren, ta tut hta yawng hpe hkap la na matu gaw Ginjaw Salang ni yawng hte hkut hkut nai nai naw bawng jahkrup ra ai lam, KIO Ninggawn Amu Madu Du Kaba Gunhtang Gam Shawng tsun wa ai.