Chyinghkrang Hka Mawru
June 05, 2006

Malihkrang Uma

Myitkyina mare lahta na Chyinghkrang Hka hte Tang Hpre mare na Tang Hpre Hka hta laiwa sai May 31 ya shana hta Hka mawru byin wa ai majaw mare masha 6 hte Chyinghkrang Hka Wanjak sin ai balik 5 si lawm mat ai lam chye lu ai.

Tang Hpre mare na Shingrai htinggaw hte kaga htinggaw lahkawng gaw n’ta hte hpawn yawng si mat ai lam chye lu ai. Chyinghkrang Hka wanjak sin ai balik ni gaw sinat hte hpawn lawm mat ai rai nga ai.

Chyinghkrang Hka wanjak mung Hka hta yawng lawm mat ai re majaw, jak ni yawng hten mat n’na, shawoi shaning gaw Myitkyina mare de lanam ta rai yang Hka wanjak na Mihprap wan lu ai raitim, ya ten gaw Myitkyina ting nsin chyip rai nga ai.

Chyinghkrang Hka Wanjak gaw Myitkyina mare Dingdung de Deng 17 tsan ai shara kaw Myitkyina mare grup yin nga ai mung shawa n’gun ht gaw gap da ai rai nga ai. Raitim, kaja wa Mihprap wan lu lang ai gaw Myen Hpyen dap hte Balik dap ni sha rai nga ai.

Dai Hka mawru byin ai shana gaw Myitkyina grup yin hta Mali Hka kaba wa na zawn she rai hkra Hka rawt wa ai majaw mung shawa yawng grai kyin mat ai shana rai nga ai.

N’kau mi gaw Chyinghkrang Hka Wanjak hten mat ai majaw Atsuya hku na Mali Hka Wanjak hpe Mung masa jahtuk nga ai kata kaw na lawan wan Mihprap wan lu na matu lajang wa na hpe myit mada let kabu ma ai.