N’mai Hka Kaw Ja Htu ai Jinghpaw ni hpe Rim
June 14, 2006

Malihkrang Uma

June shata praw kaw n’na N’mai Hka mayan Ja htu sha nga ai Jinghpaw ni hpe Myitkyina na Myen Balik ni lung wa let hkan rim hkawm ai lam chye lu ai.

N’dai masing gaw Myen hpyen dap Dingdung Ginjaw Dap Up Du Kaba Ohn Myint a lak san re lam chye lu ai. Rim hkrum ai ni law malawng gaw Wunpawng Mungdan Shanglawt Hpung, KIO, de kang bang ai majaw rim ai rai nga ai. Raitim, KIO kawn garan pru mat wa ai Lasang Awng Wa hpung de kang jaw ai ni hpe gaw bai dat ai lam chye lu ai.

Rim hkrum ai Ja htu ai ni law malawng gaw Atsuya kaw na lekmat hte htu nga ai ni hkrai rai nga ai. Raitim, n’dai zawn Myen Balik ni hku n’na rim hkawm wa ai gaw KIO de kang jaw ai majaw rai na re ngu kam nga ma ai.

Ya hkan rim hkawm ai mung KIO uphkang ai shingwang kata kaw rim la ai rai n’na, rim hkrum ai ni kaw Sut Du ni pyi lawm ai lam chye lu ai. “Shanglawt salang ni nga taw ai shawng kaw nan hkan rim la tim, Shanglawt ni mung hpa n tsun ya ma ai,” nga n’na rim hkrum ai ni a nta masha ni tsun wa ma ai.