Jarit Mayan hta Miwa N-gu Garan
The Kachin Post / December 12, 2006

Miwa mung Yunnan mungdaw atsuya hku n’na Jinghpaw-Miwa ga jarit mayan hta chyam bra nga ai nang hpam tsi mawan ni hpe tek jum gasat shamyit kau lu na matu Myen hpyen atsu ya hte gap hkat jahkring tawn ai uhpung ni hpe n-gu garum jaw nga ai lam, ni nawn ai shiga lawk hku chye lu ai.

N’dai masing hpe laiwa sai November shata 17 ya hta Laiza kaw Miwa Yunnan mungdaw atsuya, Wunpawng Mungdan Shanglawt Hpung, KIO, hte Myen hpyen atsuya ni bawng ban jahkrup ngut ai hpang bungli hpang wa ai rai nga ai.

N-gu buri kade garan ya ai gaw hkrak n chye tim, Jinghpaw-Miwa ga jarit na gap hkat jahkring hpung ni yawng hpe garum jaw na re lam, Laiza mare masha langai tsun ai. Maga myi hku n’na gaw, Myen mung kata na n-gu ni hpe ga jarit de tsep kawp shalai n mai ai lam chye lu ai.

Miwa hku n’na jarit mayan hta nang hpam tsi chyam bra nga ai hpe shazim kau mayu ai majaw, gap hkat jahkring hpung ni hpe n-gu garan ai lam gara hku matut manoi nga ai hpe hkrak n chye tim, gap hkat jahkring hpung ni hpe Myen hte Miwa pawng n’na, gau ngwi ngwi shakyet hkra galaw wa ai lam re ai hpe, KIO magam gun n’kau shadu nga ai lam chye lu ai. Gap hkat jahkring hpung ni hku n’na jarit mayan hta nang hpam tsi chyam bra nga ai hpe atsawm sha tek jum n lu yang, n-gu shalai ya nga ai hpe dawm kau ya na ngu ai lachyum pru ai hpe mu ai lam, mying n tsun ai KIO du langai tsun ai.

Ya ten hta, ga jarit mayan Miwa mung kata na mare kahtawng yawng hkan nang hpam tsi mawan hte AIDS a’na hpe ninghkap ai Poster ni hpe jung tawn ai hpe chye lu ai. Raitim, Jinghpaw mung kata hta gaw, hpa galaw sha na matu n mai byin ai majaw, nang hpam tsi mawan hpe hpaga langai hku galaw sha nga ai lam, Laiza mare masha wa tsun ai.