Gangdau Yang kaw Lak Nak Kaba Dap De na Myen Lajang
The Kachin Post / December 21, 2006

Laiza mare kawn Mawdaw hte hking hkum 2 daram sa ra ai Gangdau Yang ginra hta Myen Hpyen dap kawn laknak kaba dap langai jung na matu shajing nga ma ai lam, dai mare grup yin na masha ni kawn chye lu ai.

Gangdau Yang makau kaw Bull Dozer ni hte ga shara nga sai rai n’na, lak nak kaba ni hpe sa shakap na matut galaw nga ai lam, Gandau Yang makau na Nam San Yang mare masha langai tsun ai. N’dai shara kawn nau n tsan ai Sinpraw hkran hta Wunpawng Mungdan Shanglawt Hpung, KIO, ginjaw Laiza mare hpe lak nak kaba hte KIO hpe tek jum lu na matu hkyen lajang nga ai re lam, mare masha ni shadu nga ma ai.

N’dai sha n ga, Namti mare Sinna hkran na KIO a dap dung 11 nga ai Gwi Marit Bum hta mung lak nak kaba ni sa tawn sai rai n’na, Myitkyina mare Sinpraw Hkran na Maina Bum hta mung lak nak kaba ni shakap tawn let, Myitkyina, Moe Gawng hte Moe Nyin ginra ni hpe hpyen masa hku tek jum lu hkra lajang nga sai lam, chye lu ai.

Myen hpyen dap n’dai zawn lak nak kaba ni hpe KIO hpyen dap makau hkan htawt sit tawn ai lam gaw, Myen hpyen lagaw dap hte KIO hpe gasat na matu Myen hpyen dap kata kaw hpyen hprawng ni law wa ai sha n ga, Ma hpyne la ni sha rai wa ai majaw, nau n mai byin ai lam, Myen hpyen dap shamu shamawt ai lam hpe sin yu nga ai Miwa mung jarit na Aung Kyaw Zaw tsun ai. Dai re majaw, Myen hpyen dap gaw lak nak kaba n gun lang n’na maja gap bun ngut ai hpang she, masha hte shang gasat na lam nga ai ngu shi matut tsun ai.