N’mawk kaw Atik Anang Bungli Shangun
Lahpai Zau Gam / November 01, 2006

Jinghpaw mung N’mawk mare na Myen hpyen dap ni gaw mare masha ni hpe Kyet-Su hpun hkai masing hta atik anan shangun sha nga ai, mare masha kawn chye lu ai.

N’mawk na Myen hpyen dap dung 437 kawn seng ang ai mare salang ni hpe Kyet-Su hpun hkai na matu n’ta htinggaw mi marai mi n hkan n mai bungli galaw ya ra ai lam matsun da ai rai nga ai.

Kyet-Su hpun hkai ai dabang de n hkan lu yang gaw, bungli galaw sa ai ni hpe htaw wa htaw sa galaw ai mawdaw ni hpe sau bang ya ra ai lam, mare masha ni tsun ai. Mawdaw sau manu gaw Myen gumhpraw lap 20,000 daram ang ai lam chye lu ai. “Kyet-Su hpun hkai ya ra ai majaw, tiang a bungli mung hten, gumhpraw mung kahtap jaw ra yang gaw anhte ni hpa baw sa sha na rai?,” ngu N’mawk na jinghpaw mare masha langai tsun ai

N’mawk na deng 17 hte deng 14 kaw na mare ningnan lam makau hkan Kyet-Su hpun hkai shangun nga ai re lam, N’mawk na Jinghpaw mare masha langai tsun ai. KIO a Hpun shapa jak rung kaw na deng 7 daram tsan ai N’mawk mare du hkra lam makau hkan mung hkai shangu ai lam shi matut tsun ai.

Ya na zawn Kyet-Su hpun hkai na matu atik anang bungli shangun sha nga ai majaw, N’mawk na Jinghpaw hte Sam mare masha ni gaw N’mawk na Myen hpyen dap hpe grai pawt nga ai lam chye lu ai.