Myen-Miwa Pawng n’na N’hprang Sut Rai Tam Na
Lahpai Zau Gam / November 06, 2006

Miwa gumsan mung Yunnan mungdaw Baoshan mare na Chyan Yin Wu company gaw Myen mung na company langai hte jahkrup n’na Jinghpaw mung kata hta Ja hte N’hprang sut rai tam na bungli li hpang wa sana re lam, ni nawn ai shiga lawk kawn chye lu ai.

Chyan Yin Wu company gaw Jinghpaw mung N’mai Hku ginra hte Shwe Gu mare makau hkan na Ja hte kaga N’hprang sut rai ni hpe tam shaw na ahkang lu da ai rai nga ai. Chyan Yin Wu company gaw Jinghpaw mung, Sam mung hte Mun mung daw hkan 3 ning na laman N’hprang sut rai tam shaw na ahkang hte seng n’na laiwa sai August shata hta Myen mung na Shwe-Joe-Jar company hte ta masat mahkret da sai rai nga ai.

N’hprang sut rai tam ai hta ra ang ai arang ni yawng hpe Miwa company kawn ma hkam na rai n’na, Myen maga na gaw seng ang ai Myen uphkang ai ni hte manu bungli byin na lam hte bungli sa galaw na Miwa ni a shim lam hte company arung arai yawng hpe lit la sin ya na lam chye lu ai.

Bungli awng dang wa yang, magam bungli akyu amyat a tsa hta shadang 2 hpe Myen company hpe jaw mat na re lam chye lu ai. N’hprang sut rai tam masing hta Miwa company gaw seng ang ai buga na amyu sha gap hkat jahkring hpung ni hte jahkrup ra ai lam n nga ai sha, Myen uphkang ai ni hte dan tawk matut mahkai n’na galaw ai re lam chye lu ai.