Chiang Mai kaw EEDY Rung Hpaw Hkyen
October 01, 2006

Mali Pan Tsun

Jinghpaw Wunpawng ramma ni amyu sha lam yan hta chye tsap wa lu hkra yaw let hpa tawn ai Education and Economic Development for Youth, EEDY, ngu ai magam dap a rung langai hpe Thai mungdan Chiang Mai mare kau nau n na ai ten hpe hpaw na lam, KIO shiga lawk hku chye lu ai.

EEDY Chiang Mai rung hpaw na matu EEDY masat yan langai jawng yu Hpaw Wung Hkun Seng gaw lajang ra ai lam ni galaw na matu October 1 ya hta Thai mungdan de rawt wa sai lam chye lu ai.

EEDY gaw KIO a Youth Affairs Committee n’pu na ramma ni matu laksan hpaw ninghtan da ai magam masing langai rai nga ai. EEDY hpe 2002 ning April shata kawn masat yan 1 ngu hpaw hpang let, ya ten du hkra rai yang masat yan 6 du hpe shangut la lu sai rai nga ai.

Masat yan shagu hta Buga shara shagu de na Jinghpaw Wunpawng ramma marai 200 kawn 500 lapran shang lawm ma ai rai nga ai. EEDY hta shang lawm ai ni law malawng gaw Dakkasu Jawngma ni rai ma ai.

KIO Ginjaw Salang Du Kaba Gun Maw woi awn myit ningchan shaw let hpaw hpang wa ai EEDY gaw amyu sha lam yan hta tsap lu ai ramma ni byin tai wa lu hkra wunkat jaw ya nga ai masing re lam chye lu ai.

Ya ten hta EEDY gaw jahkrai ma ni matu jawng langai hpaw let, Jinghpaw ma ni hpaji chye wa lu na matu shakut ya nga ai ma ai.