Laiza na Jawngma ni Myitkyina de Shang Yak
October 11, 2006

Lahpai Zau Gam

Myitkyina mare hta motorcycle ni hpe rim nga ai majaw Laiza mare nga Dakkasu Jawng ma ni Myitkyina de jawng sa lung na matu shang yak nga ai lam, Laiza shiga lawk hku chye lu ai.

Myitkyina na motorcycle jawn n’na shang n mai ai majaw, Laja Yang gate kaw motorcycle tawn n’na mawdaw hte Myitkyin na de sa ra ai, ngu Laiza nga Dakkasu jawng ma langai tsun ai. “Motorcycle jawn n’na jawng lung ra ai re majaw, motorcycle n nga yang anhte jawngma ni a lagaw hpe gayet daw ai hpa rai nga sai.”

Ya ten Myitkyina mare kaw motorcycle ni hpe rim nga ai majaw Dakkasu jawngma ni sha n ga, mare masha ni mung myit htum nga ai lam chye lu ai.

Dai sha n ga, Nam San Yang, Gang Dau Yang, Nalung hte Laja Yang buga na Laiza mare de motorcycle lang n’na bungli sa galaw sha nga ai ni mung jam jau nga ai hpe chye lu ai. Motorcycle lang n mai ai majaw, Laiza kaw bungli galaw ngut yang n’ta de n mai wa n’na n’ta bungli ni n mai galaw sai majaw yak ai lam, Nalung mare masha langai tsun ai.