KIO gaw Mung Masa Party N re; N’ban La Tsun
The Kachin Post / October 26, 2006

Wunpawng Mungdan Shanglawt Hpung, KIO, gaw Wunpawng amyu sha ni yawng a matu awng dawm ai Wupawng Mungdan Shanglawt lu na matu galaw sa nga ai amyu sha party re ai lam, KIO ningbaw malai Du Kaba N’ban La tsun ai.

“Wunpawng Mungdan Shanglawt Hpung party gaw Mung masa party n re, amyu sha party she re,” ngu Du Kaba N’ban La gaw October 25 ya hta Laiza mare kaw galaw ai 46 ning hpring KIO masat n’htoi hta tsun ai rai nga ai.

N’dai lam hte seng n’na KIO ginjaw committee malawm langai rai nga ai Du Kaba Sumlut Gun Maw gaw, KIO a amyu sha lam yan hta tsap n’na, amyu sha ting lawt lu lam matu galaw nga ai hpe tsun sanglang dan ai re lam, tsun ai. KIO hku n’na mung mung masa party langai hku tsap nga ai n re sha, mung masa party de galai shai na masing mung n nga shi ai lam, shi matut tsun ai.

Ya ten hta KIO gaw Nyaung-hna-pin kaw Myen hpyen atsuya woi galaw nga ai National Convention hta shang lawm nga ai rai nga ai. Ngut n’na, laiwa sai April shata hta KIO Ginjaw Hkumra Zuphpwng kawn Mung Masa Bunghkan Komiti ngu ai hpe hpaw shabawn tawn sai rai nga ai.

Mung masa maram yu ai ni hku n’na gaw, ya ten KIO hkawm sa nga ai mung masa lahkam ni gaw Wunpawng amyu sha ting matu awng dawm shanglawt lu lam matu hkawm sa nga tim, aten kadun laman hta Myen hpyne atsuya woi galaw nga ai mung masa ninggam ni hta shanglawm let lu mai ai mung masa ahkaw ahkang ni hpe lu hkra mung masa party langai zawn shakut nga ai hpe, shadu nga ma ai.

Raitim, KIO gaw du na ra ai ten Myen mung kaw galaw wa na mung masa ra lata poi hkan shang lawm na matut hpa mung masing jahkrat da ai lam n nga shi ai lam, Du Kaba Gun Maw tsun ai.