Laiza na Casino de Miwa ni N mai Sa
September 11, 2006

Lahpai Zau Gam

Laiza mare kaw hpaw tawn ai Casino ginsup dabang de Miwa ni hkawm sa ai lam hpe September 4 ya kawn pat kau sai lam, mare masha ni kawn chye lu ai. Miwa uphkang du ni kawn Miwa ni Laiza de na Casino de sa ginsup na hpe n ra sharawng ai majaw pat kau ai rai nga ai.

Wunpawng Mungdan Shanglawt Hpung, KIO, uphkang ginra Laiza mare kawn hpaw tawn ai Casino ni hta lani mi Miwa marai Hking lam sa ginsup ma ai lam chye lu ai. Dai hta Hong Kong, Macau hte Miwa mung shara shagu na Miwa Lauban ni mung lawm ai rai nga ai. Shani shagu Myen gumhpraw Sen 500 lahta shadang n’na ginsup ma ai lam chye lu ai.

Ya n’dai zawn Miwa ni hpe Casino de hkawm sa na pat kau ai majaw, Casino hkan bungli galaw nga ai Miwa marai 500 daram kaw na 300 daram gaw Miwa mung de bai wa mat sai lam na lu ai. Casino hta bungli galaw ai ni gaw shata mi Miwa gumhpraw Yuan 1,000 lu ma ai rai nga ai.

Casino sa ginsup ai Miwa Lauban law malawng gaw shanhte a Body Guard law law hte sa ginsup ai sha n ga, kalang lang sinat ni mung lawm ai lam chye lu ai. Raitim, KIO ginra de gaw sinat n hpai shangun ai lam Casino lit hkam KIO salang langai tsun ai.

2000 ning hta hpaw hpang wa ai Laiza na Casino ni hta, Miwa ni sha n ga, Myen Myen Hpyen dap na kai chyan ni hte shanglawt dap na Du ni mung ginsup ai hpe mu ai lam, Laiza na mare masha langai tsun dan wa ai.

Jinghpaw mung na Hpun hpaga kaja nga ai aten hta Casion hkan masha ni grai hpring chyat nga tim, ya n’dai zawn Miwa atsuya a pat shingdan ai lam majaw Casino hkan masha nau n nga mat sai hpe chye lu ai.

Laiza na Casion de masha nau n sa ginsup mat ai majaw Casino hpe shamyet n’na n’na dut lu dut sha galaw nga ai Laiza mare masha ni matu mung shang gumhpraw hkra nga ai lam chye lu ai.