Uma Bum Ga Hkrun Lam Ningmu
Malihkrang Uma / May 01, 2009

Lai wa sai April shata laman Uma Bum Ga de sa du lu nngai. Uma Bum ngu ai gaw, Mali hka hte Hkrang Hka lapran na Mali-hkrang Walawng mayan hpe ngu ai rai nga ai. Anhte Jinghpaw Wunpawng amyu sha ni a nga ngawn ginra langai mung tai lai wa sai. Lai wa sai Ji Woi Ji Wa ni a prat hta tinang Ga tinang nga n’na makawp maga let, hkai lu hkai sha n’na Hkrung grin ai (Sustainable society) hku galaw lu galaw sha ai ga rai nga ai.

Ji jaw jat jaw prat e pyi masha jahpan grai law ai hku nga pra yu sai lamu ga mung rai nga ai. Dai shara hkan nga ai Mare Kahtawng mying ni hpe n du yu ai raitim, na yu ai grai lang re majaw myit shingran n’na pyi grai pyaw ai shara ni rai nga ai. N-gumla, Share Uma, Hkum Boi Ga, Karing Ga, Kadaw Lahtaw Ga, Hkalen Ga, Jahti Yang, Layen, Kachyi Htu Ga, zawn re ai ni gaw anhte amyu sha ni grai tsun jahta ai lamu ga ni rai nga ai. Garai n du shi ai kaw n’na pyi marit shingran let pyaw nngai. Kaja wa sa du ai shaloi gaw?

Raitim, ya gaw myit mada shara nau n nga ai zawn byin taw nga sai hpe mu lu ai. Mare kahtawng ningchyawng shagu Ramma greng ai n nga mat sai. Mali hka mayan hte Ja Rawng ai Kawng marawn, hka raw n hkap shagu mung Ja sa htu ai kaga amyu ni hkrai hpring chyat rai nga ai. Mare kahtang hkan e, Myo ga na Gat sa dut ai anhte amyu shayi num sha ni hte mare sin ai Gaida gaina ni sha nga jawng ai shara hkan, Jinghpaw Wunpawng amyu hpan n re ai kaga amyu shabrang Wa ngan ni she madu sha nga ma ai.

Anhte amyu shabrang ni gaw KIA Hpyen Dap de hkrai sumpum nga ai. Asak 12, 13 ning hpring sai hte woi la la rai ma ai nga n’na mare masha ni tsun wa ai. Loi mi chye chyang ai kanu kawa ni gaw kaji ten kaw n’na Sumpra Bum, Myitkyina hkan na Jinghku Jing yu ni kaw sa tawn da n’na Ma ni hpe laika hpaji sharin shakut ya ma ai. Mare kaw ahkyak yang dawjau galaw shangun na Ramma pyi n nga ai.

Asak kung sai dinggai dingla hte ma kaji ni hpe bau maka na, lam woi lakawn na Sak ram ai dinghku la, Ramma n nga ai hpe mu lu nga ai. Myo hkan na Ramma ni mung Shanglawt lahkawn na tsang ai majaw Ja sa htu na n gwi ai. Dai majaw Ja maw shagu gaw Myen, Sam, Gala, Miwa ni hkrai hpring chyat rai n’na pyaw rawng nga ma ai. Ni nawn ai mare hkan na Num ni hte pyaw nga ma ai. Myo hkan na gat dut shayi sha ni hte pyaw nga ma ai. Anhte amyu shadang sha ni gaw shara mi kaw hkrai majaw mat n’na dinghku lit n la, mare makawp maga ai masha n nga rai taw sai.

Ma kaji gaw kawa lu ai mada, n lu ai mada grai law sai, Jawng lung na ten hta jawng n nga ai shara ni mung law law rai nga ai. KIO kaw na hpaw da ai Jawng kaba ni mung langai lahkawng gaw nga tim, hkrun lam tsan ai majaw n sa lung lu ai ni law law nga shajang ma ai.

N’kau mare ni gaw dam lada n’na hkai lu hkai sha mai ai shara kaja ni hpe Ja Maw karan kau ya ai majaw mare htawt ra na zawn re ai shara ni mung law law rai nga ai. Ja htu ngut ai shara ni gaw mi na zawn rai n’na shara kaja bai lu na n mai byin mat sai. Bum ga hkan e gaw lamu ga dam lada n’na, hkau-hting hkau-na galaw na shara grai taw ai rai nga ai. Ja rawng ai mung shara shagu rai nga ai. Dai majaw shara loi mi dam lada n’na hka lu mai ai shara ni gaw Ja maw tai mat ai. Ja maw n tai hkra pat hkum na matu mung mare madu ni n lu tsun sai. N’kau mare hkan Mare de pyi wang shakum kumba she lai hkra Ja htu kau ya tim, wang madu ni kadai hpe shawk na n chye, nhtang hku she mara shagun katut re ai baw ni mung law law rai nga ai.

Laika ka ai wa garai n du shi yang Asuya Immigration ni gaw Uma ga de masha jahpan la na matu lung hkawm ma ai da, dai shaloi shanhte masat da ai Immigration Area malawng maga mat mat sai nga n’na tsun da ai lam chye lu ai.

N’dai zawn re ai Uma Ga hpe kadai wa bai makawp maga ya na ta? Anhte amyu ni hkrung grin ai prat hpe bai lu la hkra kaning di ra na kun? Mi moi na prat hpe bai myit yu n’na mi prwi she pru na zawn hkam sha n’ngai law.

Lahta na ningmu ni gaw Malihkrang Uma a ningmu ni sha rai n’na, The Kachin Post a ningmu ni n rai ga ai.