Ga Sadi a Mahtai

N’hkum Dut

August 24, 2004 — Kalang mi na Myen Hkaw Hkam gaw Thai mungdan Ayudaya mare hpe sa gasat dang la ai shaloi Thai Hkaw Hkam hpe mung myen mung de woi mat wa ai da. Dai Thai Hkaw Hkam gaw myit ru myit yak lam hkum sumhpa hte si wa mahka e, “Ngai gaw ndai prat kaw na tawt lai wa n’na, hpang na prat kaw bai shangai wa ai shaloi, myen mung ting hpe jahten sharun kau lu ai wa byin tai wa u ga law,” nga n’na kyu hpyi ai hpang si mat wa ai da.

Hpan wa Ningsang, Chye wa Ningchyang gaw Thai Hkaw Hkam wa a kyu hpyi ga hpe na ya wu ai rai n’na, shi gaw Shu Maung ngu ai mying hte shangai wa ai rai yang, hpang e General Ne Win ngu ai mying hte gumhkawng wa sai da. Ne Win gaw shi a kyu hpyi ga hte shangai wa ai rai n’na, shi a hpung dagu hte myen mung ting hpe jahten sharun kau lu sai lam Yangon na grai ahkyak ai hpung kyi kaba langai tsun wa yu sai rai nga ai.

Kaga maumwi langai rai jang, lani mi na Japan majan poi kaw Jinghpaw hpyen hpung ni gaw Japan hpyen hpung langai hpe n ngam hkra shakre kau na matu wang tawn ma ai da. Dai Japan hpyen hpung hpe uphkang nga ai Japan hpyen du kadun dawk re ai wa gaw shi hpe Jinghpaw hpyen la ni e sat kau ai kaw na koi yen lu na matu shi a hkum hpe shi nan sat si na hku daw dan nu ai da. Shi gun ai nhtu galu hpe shaw la n’na “Ngai gaw dai ni si mat wa sai raitim, aten kadun laman bai shangai wa n’na Jinghpaw Wunpawng amyu ni hpe jahten sharun kau lu ai wa byin tai wa u ga law” nga n’na kyu hpyi ngut ai hte shi a salum ang ang kaw galun bang dat ai hte si gadawng mat wa sai da.

Grai gum hkawng ai myi htoi langai hpe shingran sa jaw ai hku rai yang, dai Japan du gaw Japan majan hpang e Jinghpaw amyu ni kaw shangai wa sai rai n’na, shi gaw ja gumhpraw lu n’na gum hkawng ai wa byin wa sai da. Shi gaw myu tsaw myit kaba ai hte shi du hkawm ai shara hkan na shayi sha ni hpe grai matsan dum chye ai wa mung rai n’na, Jinghpaw amyu ni hpe dum bru dum bra byin hkra galaw na matu atsam rawng ai wa mung re, nga n’na tsun wa sai rai nga ai.

Langji u e pyen yu su. Majoi Shingra bum pungding kaw dung n’na mada yu dat yang, dai Japan du gaw bai shangai chying hkai wa n’na gara hkan e nga hkawm ai kun! mu lu na re. Shi gaw kadun dawk re ai hkum shing yan hte shangai wa n’na, shi a akyu hpyi ga hku rai yang shi gaw Jinghpaw Wunpawng sha ni hten run mat hkra galaw lu na matu hpaji hte ja gumhpraw lu ai wa rai na re. Shi hpe hkrum hkra tam n’na tsun dan u.

Shi a numla gaw Japan raitim shi a kanu kawa gaw Jinghpaw amyu rai n’na, shi a sai mung Jinghpaw sai sha re lam chye na hkra tsun dan u. Mare ning htawn, bum lang hkaraw hte maigan hkan e, hkan ayai shabra tawn ai shi a n’gyi ma ni mung Jinghpaw sai rawng ai ma ni hkrai re. Jinghpaw amyu shada sat hkat nat hkat na matu shakut hkawm ai nga yang, n chye n kaw re ai shi a n’gyi kanu ni hte n’gyi ma ni mung myit ru myit yak ai lam hkrum sha nga ma ai hpe yu n’na myit hprang ra sai lam tsun dan u.

“Shawa n’sen, Mung masha n’sen” ngu ai ga hkaw hte Jinghpaw amyu ni hpe ja gumhpraw madun n’na lam shadam nga ai kaw na dum hprang wa ai hpu nau ni mung nga wa magang sai. Lang Ji u e, shara shagu hkan e pyen yu su. Japan du langai hkan shanut ai majaw Jinghpaw Wunpawng amyu shada sat hkat n’na asak sum ai mung law htam wa nga sai. Dai zawn re ai mabyin masa hpe mu chye n’na Jinghpaw amyu ni a lapran e aten dep chye na hkat wa hkra hkan htawn tsun dan u yaw.

Lahta na ningmu hte myitmang ai lam ni gaw ka shalat ai wa N’hkum Dut a mu mada ai lam ni sha rai n’na, The Kachin Post a ning mu ni n re ai hpe chye shangun mayu ga ai.