Nang Shoi Nang Sha N rai Ga

Alen Tsadoi

January 13, 2004 — Jinghpaw Wunpawng Myusha ni a gam maka lam hte seng n’na lai wa sai bat praw hta Mungshaw Salang ni, Hpung Salang ni hte Ramman Salang ni KIO ningbaw ni hte ya na zawn lam law law hku n’na tsun jahta bawngban shanglawm wa ai lam gaw kaja ai lam rai nga ai.

Wunpawng Mungdan Shanglawt Hhpung(KIO) ngu ai shaning 40 jan du hkra dwi ai, sau ai, hka ai, jap ai, kawsi hpang gara, du daw sai hkaw hte gaw da ai Myusha lam yan hta myit daw myit hten ai lam n nga tsap nga ai Myusha yawng a Wuhpung re ngu mu mada ai. Ndai ram ning grin nga lu ai mung KIO a Ningbaw Ningla ni byin n’na, laknak greng n’na, policy lam yan hta kaja n’na sha grin nga ai n re teng ai, Myusha ni a madi shadaw lam nga ai majaw sha grin nga lu ai hpe kadai mung ningdang lu na n rai nga ai.

Ndai ram wa myusha ni madi shadaw nga ai uhpung langai myi hta KIO chyusha myusha lam yan hta n mai daw dan ai nga yang gaw kaga alak myi re ai kadai hpe naw tsun na ta? Ngai chye na ai hku nga yang Myen hpyen du ni hte Simsa lam la ai mung shawa masha Myitsu Salang ni law law hte bawng ban jahkrup ai lam galaw ai hpang she galaw wa ai re ngu mu mada ai.

KIO a Ningbaw ningla ni mung tinang a tinggyeng myit hte chyu daw dan taw nga ai mung n rai na re. Shanhte nan mung Rawtmalan ningnan hpang wa ai ten kaw na myusha dawwa dawtsa yawng shang lawm ra ai nga n’na n gup tsu hkra tsun wa ai hpe mung na lu chye lu ai re. Sha n’ga daini na aten hta mung, byin mai ai mahkrun law law tam n’na myusha ni hpe zinlum woi awn nga ai re ngu mu mada ai.

Dai mahkrun lam tam ai a gashadawn langai hku na gaw, Mungbawng Zuphpawng hpe Tinang a shalawt da lu ai shara hta hkap la woi galaw hpang mat wa ai gaw labau hta Ja laika hte kada ging ai lam kaba langai re. Dai Zuphpawng mung myusha ni a myitsu salang ni law malaw hpe byin mai ai ladat hku nna woi galaw wa nga ai re ngu kam ai. Dai Mungbawng Rapdaw hpe byintai wa hkra mung shahte KIO hkrai grai byin n’na galaw ai n rai.

KDA, NDA-K hte Htunghking Nigbaw ni, Hpung Sara Kaba Myitsu ni, Mtyitsu Salang ni hte Ramma ni mung shanglawm bawngban n’na byin wa ai Rapdaw Kaba langai re. Dai ni KIO, KDA hte NDA-K ni shamu shamawt ai mung Mungbawng Rapdaw a myitsu ni sawn yu hpaji jaw ai kata kaw she shamu shamawt ai lam re ngu asan sha mu mada ai.

Dai n re sha anhte dai ni kaga Mungbawng Rapdaw Kaba ningnan, Hpung ningnan ni bai hpaw shabawn n’na myi e anhte Myusha yawng a Common Platform hta n tsap ai sha nangshoi nang sha nga n’na nga taw yang gaw kabu ai ni grai kabu nga na sai, dum ga ngu myusha yawng hpe jasu mayu ai.

Dec 28, 2003 shani KIO ginjaw de tang shawn ai laika hta na, Myusha myitsu Slang ni, Makam masham Hpung Kanu Kawa ni, Htunghking Hpung Myitsu ni hte Dak Kasu Ramma ni a n’sen mung nangshoi nangsha nga ai n’sen hku n re sha, tinang nan shang lawm hpaji jaw ai masa hku she rai u ga ngu myit mada let.

Alen Tsadoi gaw maigan mungdan langai hta Political Science Master Degree hpe sharing hkaja la nga ai Jinghpaw Wunpawng shadang langai rai nga ai. Lahta na ningmu ni gaw shi a ningmu ni sha rai n’na The Kachin Post a ning mu ni n re ai lam hpe chye shangun mayu ga ai.