Mahtai Jaw Ya Rit

Hkyihkang / USA

September 7, 2004 — Daini na myen mung a mung masa lam yan gaw National Convention, NC, a majaw kalang bai shamu wa sai. Mung mare masha ni mung ma sa hta myit yu sawn yu dinglik yu wa ai hpe mu lu ga ai. Dai gaw kaja ai lachyum re hpe mu mada ai. Maigan du Jinghpaw Wunpawng sha ni mung, mung masa shiga, buga shiga ni hpe lam amyu myu hku na madat nga, azi hti yu nga ga ai.

Dai hku internet shi laika hta lawm ai laika ngau ni hta na n chye sawn la lu ai, mau hpa, yawn hpa laika ngau re ai Du Kaba James Lum Dau na laika ngau ni hpe sang lang dinglik mayu ai. Du Kaba gaw Wunpawng Mungdan Shanglawt Hpung, KIO, Ginjaw Committee malawm langai re ai sha n ga, KIO a maigan kyit hkai lit hkam langai re ai lam hte mahkrum madup law ai wa re ai hpe chye lu ga ai. Raitim shi a laika ngau ni gaw anhte ramma ni hpe hpa machye machyang n jat ya ai sha Myen Hpyen Atsuya hpe aja awa madi shadaw na matu hkalem ai (propaganda) lam sha re ai hpe mau hpa mu hti ga ai

Shi a laika ngau langai hta “SPDC galaw lai wa ai lam ni n tara ai ngu madi shadawn na matu Constitution n nga ai,” nga ka da ai hpe hti lu ga ai. N tara ai hpe shadawn na matu Constitution n ra na re. Dai hku shanhte hpe madi shadawn n’na, ahkaw ahkang mung jaw na n re ai.

Anhte KIO ni NC kaw lu ai hpe la na nga la chyum pru ai ga hpe Irrawaddy shiga dap hte hkrum shaga ai interview hta mu hti na grai mau ga ai. Daini na mung shawa ni garu nga ai lam ni gaw NC hta hpa baw hpe lu hkra hpyi na nga lam re. Myen wa gaw lam amyu myu hku hkalem nga ai hpe yawng chye na re. Moi na anhte a ningbaw Sama Duwa Sinwa Naw zawn myen kam shut na myusha yawng hpe hkraw de woi hkrat na hpe mung tsang nga ga ai. Lu ai la n’na wa na nga yang dawnghkawng hpai kagat hkawm ai Federal, dai n rai yang Union hpe hkap la na ga i? Hpun kran dut na ahkaw ahkang jaw ai Autonomy hpe hkap la na i? Uhpung langai a matu sha n yu ai sha myusha hkumdek hpe shinggyim ahkaw ahkang kade jaw na nga ai hpe mung yu ra na re ngu mu mada ga ai.

Inerview langai hta Myen Hpyen Atsuya ni woi galaw ai Constitution hpe UN kaw na n hkap la yang UN resolution hpe pi ninghkap ra ai nga lachyum pru ai ga hpe mung mau hpa mu lu ga ai. Myen Hpyen Atsuya pi dai zawn nga n tsun shi na re.

Du kaba a laika hta ningbaw ningla yaw da ra sai lamka da ai gaw grai jaw ai re. Raitim dai ni du hkra tinang a tingyen lam n tam ai sha myusha ni hpe woi awn zinlum na Ningbaw Kaba Maran Brang Seng zawn re ai ningbaw ningla kaja n pru wa shi ai hpe yawn hpa mu lu ga ai.

N’dai zawn Myen Hpyen Du ni hpe madi shadaw na matu n’gun mi alu re hkalem nga ai lam ni a lachyum hpe shawa yawng hpe sanglang dan yang kaja na re. Daini yawng chye mayu ai ga san ni gaw; n’dai zawn Du kaba tsun ai, ka ai ningmu ni gaw KIO a malai tsun ai ga ni kun? KIO a ningmu re ai kun? Du kaba a (individual) ningmu kun?

Lahta na ga ngau gaw Hkyihkang a ningmu ni sha rai n’na The Kachin Post a ningmu ni n re lam chye shangun mayu ga ai.