Kaja ai Mahtai De

Hkrumra Padang

September 17, 2004 — Shaning 2004 a hpang daw kawn internet hte Media dap hkan n’na Wunpawng Mungdan Shanglawt Hpung hte Hpyen Dap, KIO/ KIA, hte seng n’na mi rai rai, myusha lam yan hte seng n’na mi rai rai tsawmra wa mi ka shabra shajang wa sai re hpe mu lu nga saga ai.

Dai hte maren hkap hti lu ai ni mung ka da ai laika ngau ni ningtsa e hkam la ai,sawn shachyaw la ai lam amyu myu rai nga ai maram la lu lu nga ai. Laika ngau ni hpe hti yu yang laika ka ai ni gaw jaw ai hte n jaw ai hpe mu mada chye ai, ginghka chye ai ni re ngu sawn maram lu nga ai. Jinghpaw ga malai langai tsun da ai gaw nbung n bung yang hpunlap n kashun ai nga ai hte maren laika ka ai ni mung mabyin masa nga ai a jaw dai hta lakap na ka na ma nhten! Majoi shapau ka na n re n’hten! ngu sawn la n’ngai.

N jaw ai hpe jaw ai zawn ka/tsun ai wa mung masu ai wa rai na re. Jaw ai hpe n jaw ai hku ka/tsun ai wa mung masu ai wa rai na re. Jaw ai hpe n ka, n tsun ai wa mung teng man ai lam hpe nyet ai wa rai na re. Dai majaw jaw ang ai hpe gaw jaw ang ai hku tsun ga! Mala la n jaw ai hpe gaw n tsun ga!

Moi laja lana gap hkat nga ai ten gaw myusha yawng kade mi jam jau hkrup sha tim, KIO ningbaw ni hpe mana maka shagrau sha-a madi shadaw lai wa saga ai re. Dai ten e woi awn nga ai ningbaw ni mung teng sha myusha ni lawt lu ra ai, tinang a akyu ara hpe madung n tawn ai shakut lai mat wa masai hpe yawng mu chye nga ga ai re. Myen hte gap hkat shagu gaw shanglawt hpyen la ni sha n rai, mung shawa kaji kaba yawng mung jamjau lam hkrum sha lai wa sai re. Jam jau lam kade hkrum sha tim myit n daw ai madi shadaw lai wa sai re.

Shanglawt gaw-gap ai lam hta, nye a kahpu majing ni hte lawu lahta na amyu ni gaw shanglawt magam gun ai ni rai nga ai. Ngai nan mung dap de n-gu, jum gun jaw, laika sa re hku n’na shanglawt gaw-gap ai lam hta shang lawm ai wa rai n’ngai. Anhte a amyu ni gaw shanglawt ningnan hpang ai kawn shanglawt gaw-gap ai lam hta dai ni du hkra shang lawm nga ga ai re.

Myen a dip sha ai hpe n ju ai a majaw kaja tim n kaja tim shanglawt lu ra ai ngu ai myit mada lam hte KIO/ KIA gaw-gap ai lam hta e myusha law malawng gaw tinang ngut ai maga de na madi shadaw gaw-gap lawm wa saga ai re. Ding rai ten hta KIO gaw Myen Hpyen Atsuya hte simsa lam la mat wa sai re, raitim grau kaja ai mung masa mahtai lu la na matu galaw nga ma ai ngu n’na n’gun la, sharang let kam hpa ala nga ga ai re.

Simsa lam la mat wa ai kawn hpawt ni kun? Hpang na shata kun? Hpang na shaning kun ngu n’na a la nga ai ten gaw Jaw prat 21 ning de she du mat wa sai re. Kaga laklai ai mung masa gyin shalat shahpraw dat ai mung n mu, Myen Hpyen Du ni gaw n’na mungmasa bawng ban na matu ningdang taw nga ma ai law, nga n’na sha tsun nga masai. Ding rai ai lapran e grau sawng mat wa ai gaw ningbaw n’kau mi simsa lam la ai hpe ahkaw ahkang la n’na tinang a sut su lam hta mala la dinglai ai hku madung tawn shakut mat wa ai sha mi aria mat wa ai gaw yawng mu chye nga ai re. Dik shale gaw Myen hpe shatan ai pyi n ra wa ai gaw mau n ma rai nga ai. Myen wa mare masha ni hpe amyu myu hku n’na shatsang, zingri sha nga ai gaw matut ding yang re hpe gaw mi shalai kau, hpa tsun shaga lawm ai mung n nga, makawp maga ai sat lawat mung n nga re masa rai mat wa ai lam ni a majaw, matut hkam sharang n dang wa ai a jaw kapaw pru wa ai lam ni rai na re ngu n’na maram la lu n’ngai.

Ding rai ai yawng a myit kraw e rawng nga ai myusha a lam hte seng n’na ka shabra, tsun shabra nga ai lam ni gaw KIO/ KIA hpe n ra n’na gaw n rai na re, ningbaw n’kau mi a kyang lai len ni hpe galai shai kau na ra sharawng ai hte grak lagra rai n’na kam hpa ging ai ningbaw tai na hpe ra sharawng ai a majaw rai na re ngu hkam la mai ai. Wunpawng hkum ngau shagu gaw tinang a myusha hpyen la ni hpe ngang grin magrau grang nga na hpe ra sharawng ai hkrai rai na hpe gaw tsun shara n nga na re.

Jaw ai mi rai rai, n jaw ai wa mi rai rai KIO/ KIA ningbaw shada byin lai mat wa sai mang hkang ni a majaw, myusha hte seng n’na mahkrum madup ningnan lu la ai hte myusha myit hkrum lam hpe kalang mi bai ladat ningnan, lamang ningnan ni hte shakut sa wa nga ai masa rai nga sai hpe yawng myit shang sha ala yu nga ai hkrai rai na re. Ningbaw ni mung grau n’na sadi shahka ai lam nga wa ai, myusha myit hkrum lam hte myusha mung masa lai ladat ningnan ni hpe mung myit shapraw lu wa ai hte hkrang shapraw sa wa nga ai masa ni gaw myit n-gun lu hpa, myit shang sha hpa rai nga ai. Tengman, rapra ai ai hte kaja ai mahtai sha pru wu ga!

Lahta na ningmu gaw Hkrumra Padang a ningmu ni sha rai n’na The Kachin Post a ningmu ni n re ai lam chye shangun mayu ga ai. Hkrumra Padang gaw maigan mungdan langai kaw hpaji hkaja nga ai Jinghpaw Wunpawng ramma langai rai nga ai.